Vdes edhe personi i katërt nga aksidenti i mbrëmshëm

Katër persona të vdekur dhe gjashtë të lënduar, ky është epilogu i deritashëm, i aksidentit të djeshëm në rrugën Prishtinë-Gjilan në Mramor, në të cilin ishte përfshirë edhe ambasadorja turke në Kosovë, Kivilcim Kiliç, e cila ka marrë lëndime trupore.

Siç raporton Policia e Kosovës, të gjithë të lënduarit kanë marrë tretman mjekësor në QKUK, përcjell albinfo.ch.

“Raportohet aksident trafiku me përfshirjen e tri automjeteve, dy automjete me tabela vendore dhe një automjet me tabela diplomatike. Si pasoj e aksidentit në vendin e ngjarjes jetë ka ndërruar njëri vozitës mashkull dhe një pasagjere femër shqiptare, ndërsa dy pasagjerët, një mashkull dhe një femër shqiptar, kanë ndërruar jetë në QKUK. Gjithashtu si pasoj e aksidentit lëndime trupore kanë marrë gjashtë persona tjerë të përfshirë në aksident, 4 (katër) persona dy meshkuj dhe dy femra turq/shtetas të R. Turqisë, si dhe dy persona meshkuj shqiptar”, thuhet në raport, njofton Telegrafi.

Me vendimin e Prokurorit, katër trupat e pa jetë dërgohen për obduksion në Institutin e Mjekësisë Ligjore. Rasti po hetohet nga njësitet kompetente policore.

Ndërkohë, një person ka ndërruar jetë si pasojë e një aksident trafiku i cili ka ndodhur më 12 nëntor në Prishtinë.

Sipas raportit 24 orësh të Policisë së Kosovës, viktima pasi ka marr tretman mjekësorë pas disa dite iu ka përkeqësuar gjendja, ku si pasoj ka ndërruar jetë.

Ndërkaq, me vendimin e prokurorit, trupi i pa jetë i viktimës dërgohet për obduksion në IML, ndërsa i dyshuarit pas marrjes të deklaratës shtesë lirohet. Rasti mbetet nën hetime.