Turistët gjerman bllokohen në Shqipëri, Policia i merr me helikopter  

Efektivë të Komisariatit të Policisë Tropojë ndihmuan dy turistë gjermanë të cilët, duke eksploruar zonën, kishin mbetur në vendin e quajtur Curraj i Epërm.

Pas shumë orësh udhëtimi në këmbë, në zonë të vështirë, punonjësit e Policisë bënë të mundur gjetjen dhe transportimin disa orë me krahë dhe më pas me helikopter drejt Tiranës, të 2 turistëve gjermanë.

Policia sqaroi se ishte njoftuar rreth orës 21:00 të mbrëmjes së djeshme se dy turistë gjermanë, duke eksploruar zonën e quajtur Curraj i Epërm, për shkak të lodhjes dhe errësirës nuk mund të vazhdonin ecjen, transmeton atsh, përcjell Albinfo.ch.

Menjëherë pas marrjes së njoftimit, shërbimet e Komisariatit të Policisë Tropojë, janë nisur në drejtim të zonës ku kishin mbetur të bllokuar turistët. Shërbimet e Komisariatit të Policisë Tropojë, me qëllim ofrimin e ndihmës turistëve, kanë ndërhyrë në këmbë për të kontrolluar zonën. Pas disa orë kërkimesh intensive në këmbë në terrenin e thepisur, kanë bërë të mundur gjetjen e turistëve, në vendin e quajtur “Vashqefen”.

“Punonjësit e Policisë fillimisht i nxorën dy turistët nga terreni i rrezikshëm dhe më pas i kanë transportuar ata deri në vendin ku ishte e mundur ulja e helikopterit. Më pas turistët, me ndihmën e helikopterit, janë transportuar në spitalin e Tiranës dhe aktualisht ndodhen në gjendje të mirë shëndetësore”, thuhet në njoftim.