Tregti me fëmijë, për 1600 euro bleu vajzën 15-vjeçare! 

Ngritet aktakuzë në Gjykatën Penale në Shkup

 

Prokuroria Themelore Publike për ndjekje të krimit të organizuar dhe korrupsionit në Gjykatën Penale në Shkup të Maqedonisë Veriore ka parashtruar aktakuzë kundër një personi, për veprën e kryer penale-tregti me fëmijë, ndërkaq në Këshillin për Fëmijë pranë Gjykatës Penale në Shkup është parashtruar propozimi për zbatim të sanksionit ndaj fëmijëve në konflikt me ligjin mbi 16 vjeç për të njëjtën vepër, përcjell albinfo.ch.

Prokuroria Themelore Publike për ndjekjen e krimit të organizuar dhe korrupsionit sot bëri të ditur se i akuzuari në prill të këtij viti me qëllim që të martohet ka blerë viktimën 15-vjeçare për 1.600 euro, edhe pse e ka ditur moshën e vajzës. Në komunikatë sqarohet se i mituri e ka nxitur të afërmen 15-vjeçare në martesë të dakorduar, me mashtrim e ka marrë dhe e ka dërguar në vendin e dakorduar. I dyshuari ka paguar shumën e kërkuar dhe duke përdorur forcën fizike dhe dhunën psikologjike në tentim për abuzim seksual, e ka marrë me vete vajzën, e cila ka rezistuar. E dëmtuara ka shfrytëzuar rastin dhe në moment të përshtatshëm ka ikur dhe është drejtuar për te prindërit e saj. Prokurori kompetent publik, së bashku me aktakuzën në gjykatë ka parashtruar edhe propozimin për vazhdim të masës së caktuar paraprakisht, paraburgim për të akuzuarin.

---