“Travel Radar”: Në kohën kur çmimet e udhëtimeve po rriten, Shqipëria mbetet destinacioni më premtues

Në një kohë kur çmimet e udhëtimeve po rriten dhe destinacionet më të njohura po mbingarkohen, shumë turistë po kërkojnë alternativa të përballueshme dhe më pak të njohura. Kështu raporton Harmia Amadi në një artikull të botuar nga revista “Travel Radar”.

Sipas “Travel Radar”, Shqipëria është një nga tre destinacionet që po rriten më shpejt në vitin 2025, duke u vendosur përkrah vendeve bregdetare në Evropë dhe destinacioneve eksotike në Afrikën ekuatoriale.

Me peizazhet e saj të paprekura dhe trashëgiminë kulturore të pasur, këto vende po ndryshojnë në heshtje hartën e turizmit botëror.

Shqipëria – Adriatiku i përballueshëm në Evropë

Nga majat e Alpeve të Veriut e deri tek plazhet e Ksamilit, Shqipëria po kalon nga një destinacion relativisht i panjohur në një konkurrent serioz në tregun evropian të turizmit alternativ.

Organizata Botërore e Turizmit ka raportuar se Shqipëria ka shënuar një rritje prej 80% të turistëve krahasuar me vitin 2019, duke u renditur e treta në botë për këtë tregues.

Sipas të dhënave të Institutit të Statistikave, në vitin 2024 Shqipëria priti 11.7 milionë turistë ndërkombëtarë, dhe pritet që deri në fund të vitit 2025 kjo shifër të rritet me mbi 3 milionë.

Atraksionet kryesore

Shqipëria po bëhet një zgjedhje tërheqëse për turistët që kërkojnë pushime të përballueshme. Plazhet e saj të virgjëra ofrojnë mundësi të shkëlqyera për relaksim, ndërsa natyra e egër, liqenet e akullnajave dhe shtigjet malore tërheqin adhuruesit e aventurës.

Vendi ka ruajtur mikpritjen tradicionale dhe trashëgiminë kulturore, me ndikime osmane dhe greke që e bëjnë atë një destinacion unik. Muzika popullore dhe zakonet lokale ofrojnë një përvojë autentike që tërheq gjithnjë e më shumë turistë.

Kostoja e jetesës në Shqipëri është dukshëm më e ulët krahasuar me vende të tjera të Mesdheut. Për shembull, sipas të dhënave nga “Numbeo”, jetesa – pa përfshirë qiranë – është 14% më e lirë se në Greqi, me ushqimin dhe restorantet që kushtojnë edhe më pak.

Përmirësimi i infrastrukturës

Në vitet e fundit, infrastruktura turistike është përmirësuar ndjeshëm. Transporti publik është bërë më i besueshëm, dhe zhvillimet në Aeroportin Ndërkombëtar të Tiranës dhe Tunelin e Llogorasë kanë lehtësuar qasjen në Rivierën Shqiptare.

Aktualisht po zhvillohen 33 projekte turistike me një vlerë totale prej 5.3 miliardë eurosh, sipas Strategjisë Kombëtare të Turizmit 2024-2030.

Po ashtu, linjat ajrore kanë zgjeruar ndjeshëm fluturimet drejt Shqipërisë, me “Wizz Air”, “Ryanair”, “British Airways” dhe “airBaltic” që ofrojnë lidhje direkte me qytete kryesore në Evropë dhe Baltik.

Një perspektivë diplomatike

Shqipëria nuk është vetëm një destinacion turistik në rritje me çmime të përballueshme, por edhe një vend me rëndësi strategjike në arenën ndërkombëtare. Anëtarësimi në NATO, statusi si kandidatë për Bashkimin Evropian dhe mbështetja nga Banka Botërore dhe BE-ja e bëjnë Shqipërinë një vend tërheqës për investime turistike.

Për më tepër, qytetarët e BE-së dhe Britanisë mund të hyjnë në Shqipëri pa vizë për deri në 90 ditë, ndërsa amerikanët për një vit të plotë, duke e bërë atë një destinacion të përshtatshëm për pushime në Mesdhe.

---