Sllovenia i kthehet Shengenit

Sllovenia nga mesnata përsëri fillon me zbatimin e plotë të marrëveshjes së Shengenit në kufirin e saj me Kroacinë, njofton  agjencia sllovene STA, përcjell albinfo.ch.

Vendimi erdhi në përputhje me kontratën për mbylljen e rrugës ballkanike për refugjatët, për të cilën u dakorduan të hënën, në samitin BE-Turqi.

Policia sllovene lejoi të hyjnë në vend vetëm të huajt me dokumente të vlefshme udhëtimi, dhe ata që do të shprehin dëshirën për të kërkuar mbrojtje ndërkombëtare dhe personat që kanë nevojë për trajtim humanitare.

Kryeministri slloven, Miro Cerar, në një samit në Bruksel, tha se rruga ballkanike për refugjatët nuk ekziston më, dhe se Sllovenia edhe në të ardhmen do të lëshojë vetëm ata me dokumente të duhura për hyrjen në zonën Shengen.

“Samiti dërgoi një mesazh të qartë për të gjithë ata që kontrabandojnë refugjatët dhe emigrantët e paligjshëm, dhe kjo është se rruga e Ballkanit nuk ekziston më.”, tha Cerar.

Konkluzionet e samitit ishin se “flukset e paligjshme të emigrantëve do të përfundojnë”, ndërsa drafti përfundimtar ishte  se “rruga e Ballkanit është e mbyllur”, për të cilën ishte angazhuar edhe Sllovenia, tregon kryeministri slloven.