Shqiptarët shpenzojnë sa evropianët, nuk kursejnë në veshje

Konsumatorët shqiptarë shpenzojnë 4.9 % të totalit për veshje e këpucë, ndërsa edhe për evropianët kjo peshë është pothuajse e njëjtë në 5% dhe për 19 shtetet e zonës euro është njësoj me Shqipërinë

Ndoshta janë ndër popujt më të varfër, por shqiptarët nuk kursejnë në veshje.

Duke u bazuar në statistikat e INSTAT dhe Eurostat, lidhur me peshën e shpenzimeve sipas qëllimit të konsumit, tregojnë se konsumatorët shqiptarë shpenzojnë 4.9 % të totalit për veshje e këpucë, ndërsa edhe për evropianët kjo peshë është pothuajse e njëjtë në 5% dhe për 19 shtetet e zonës euro është njësoj me Shqipërinë, shkruajnë mediat shqiptare.

Shqiptarët shpenzojnë 4.9% të totalit për t’u veshur, një produkt relativisht luksi, ndonëse ata, për shkak të nivelit të ulët të të ardhurave, kanë peshën më të lartë të shpenzimeve për ushqime, një produkt i domosdoshëm, me gati 49%, nga 12.3% që harxhojnë evropianët për t’u ushqyer, përcjell albinfo.ch.

Italia është në vendin e parë me shpenzime për veshje me 6.3% të totalit. Të dytët janë portugezët, me 6.1% të totalit, të ndjekur nga Austria.

Ndryshe nga evropianët, që për argëtim dhe kulturë shpenzojnë gati 9% të buxhetit, për familjet shqiptare kjo peshë është vetëm 3%. Edhe për restorante, evropianët harxhojnë 8.2% të parave, nga 3.6% për shqiptarët.