Shqiptarët, grupi i tretë më i madh i të huajve në BE

Afërsisht 2 për qind e popullatës rezulton se është larguar çdo vit nga Shqipëria gjatë dy dekadave të fundit

Raporti i publikuar nga ‘Eurostat’, organizëm i Bashkimit Evropian, ka bërë të ditur se nga një studim i kryer në fund të vitit 2010, më shumë se 1 milionë shqiptarë rezultonin si emigrantë në disa shtete të Evropës.

Në këtë studim shqiptarët renditen si grupi i tretë më i madh i të huajve në BE, pas turqve dhe marokenëve.

Sipas këtyre të dhënave, në Itali ndodhen 467 mijë veta, të cilët përbëjnë 11 për qind të popullatës së huaj në këtë vend.

Afërsisht 2 për qind e popullatës rezulton se është larguar çdo vit nga Shqipëria gjatë dy dekadave të fundit.

Një fakt tjetër interesant i publikuar në këtë raport është edhe ai për kthimin e emigrantëve shqiptarë në atdhe për shkak të krizës në Greqi, i cili hidhet poshtë nga studimi i “Eurostat”.

Valët më të mëdha migruese të botës njihen ato të Britanisë së Madhe dhe Irlandës gjatë shekujve 18 dhe 19, kur më pak se 1 për qind e popullatës largohej çdo vit drejt botës së re.