Shqipëri: Mbi 184 mijë kërkesa për regjistrime nga jashtë, 117 016 të miratuara

Votuesit shqiptarë që jetojnë jashtë, për herë të parë, kanë mundësi që këtë vit të marrin pjesë përmes votës në zgjedhjet parlamentare të 11 majit.

Sipas shifrave zyrtare të Komisionit Qendror të Zgjedhjeve, numri i votuesve nga jashtë që kanë bërë kërkesë për t’u regjistruar ka arritur shifrën 184 040, nga të cilat 181 752 janë shqyrtuar, ndërsa deri sot, në orën 19:25, janë miratuar 117 016 kërkesa, përcjell albinfo.ch.

Sipas të dhënave janë refuzuar 64 734 kërkesa, por këtu përfshihen edhe rastet kur një zgjedhësi aplikimi i është refuzuar më shumë se një herë.

Sipas gjinisë, përqindjen më të lartë të regjistruesve e kanë meshkujt, me 109 052 kërkesa, ndërsa femrat janë 74 989.

Kërkesat për regjistrime janë nga vende të ndryshme të botës. Numri më i lartë i kërkesave është regjistruar nga Italia me 70 437, e ndjekur nga Greqia me 51 564, Gjermania me 20 994, si dhe nga SHBA me 12 622.

Sa i takon kërkesave sipas qarqeve, numri më i lartë i aplikimeve është për qarkun e Tiranës me 35 482, më pas vijnë qarqet Fier me 24 604 kërkesa, Durrës me 19 587, Elbasan me 18 596 etj.

Procesi për regjistrimin në Platformën Elektronike të Zgjedhësve (PER) ka filluar në 11 janar dhe do të zgjasë deri në 4 mars.