Shkupi dhe Kumanova, me ajrin më të ndotur në botë

Nga Ministria e Mjedisit thonë se janë ndërmarrë masa

Sezoni i ngrohjes ende nuk ka filluar plotësisht, ndërsa Shkupi tashmë është në mesin e dhjetë qyteteve më të ndotura në botë.

Në dy ditët e mëparshme, në krye të listës alarmante të ndotjes në vend  ishte Kumanova, ku grimcat PM 10 ishin 35 herë mbi normën e lejuar, me mbi 1800 mikrogramë për metër kub.

Autoritetet lokale në Kumanovë thonë se arsyeja e ndotjes së madhe atje është spitali që përdor mazut për ngrohje. Komuna njoftoi se menjëherë kanë filluar me aerosolizimin si masë urgjente për të zvogëluar ndotjen, ndërsa ka kërkuar nga pushteti qendror të ndajë fonde për gazifikimin e plotë të spitalit.

Nga Ministria e Mjedisit thonë se janë ndërmarrë masa, ndërsa më shumë informacione paralajmëruan për të hënën. Ministri resor, megjithatë, të shtunën tha se për të zgjidhur problemin e ndotjes duhet kohë dhe masa afatgjate.

---