Shefi austriak kundër terrorizmit pezullohet nga puna pas sulmit në Vjenë

Keystone

Zyrtarët austriakë kanë bërë të ditura dështime të tjera para incidentit që ka lënë të vdekur katër persona të hënën në mbrëmje në Vjenë.

Kjo situatë ka nxitur shefin kundër-terrorizmit të këtij qyteti, Erich Zwettler, që të largohet nga kjo pozitë.

Policia ka thënë se ai është pezulluar nga detyra me kërkesën e tij, shkruan Rel, përcjell Albinfo.ch.

Deri më tani është thënë se austriakët janë informuar në muajin korrik se i dyshuari ka tentuar të blejë municion në Sllovaki.

Tani austriakët kanë pranuar se sulmuesi është takuar me dy persona nga Gjermania, të cilët veçse kanë qenë duke u vëzhguar.

Ministri i Brendshëm i Austrisë, Karl Nehammer, ka folur për “gabime të qarta dhe si i konsiderojmë ne, të patolerueshme”.

Ndërkohë një xhami dhe një asociacion xhamie, që janë frekuentuar nga sulmuesi i dyshuar 20-vjeçar, tashmë janë mbyllur, meqë Ministrja për Integrim në këtë shtet, Susanne Raab, ka thënë se të njëjtat kanë kontribuuar në radikalizimin e tij.

Ai ka vizituar vazhdimisht xhamitë në Ottakring dhe Meidling.

Raab ka thënë se qëllimi i terrorizimit është që të krijojë ndasi në shoqëri në mes të myslimanëve dhe jomyslimanëve.

Në orët e mbrëmjes të së hënës, sulmuesi i dyshuari ka nisur sulm me armë zjarri në qendër të Vjenës.