SHBA: 300 mijë vende të reja pune

Ekonomia më e madhe në botë raporton plot 304 mijë vende të reja pune në sektorin jobujqësor gjatë janarit, duke hedhur kështu poshtë çdo lloj parashikimi si dhe frike në lidhje me efektin e mbylljes së qeverisë amerikane për më shumë se 1 muaj.

Papunësia është ngjitur në 4%, nga 3.9% që ishte muajin paraardhës, disi larg niveleve të pak muajve më parë, por sërish pranë niveleve rekord të ulëta.

Ekspertët e Departamentit të Punës nënvizojnë se të punësuarit federalë janë numëruar si të punësuar gjatë kësaj periudhe, pasi ata kanë marrë pagë deri në javën e dytë të janarit, kur edhe është kryer anketimi, transmeton ‘Scan’.

Rritja e vendeve të reja të punës me rreth 300 mijë në SHBA është thuajse sa dyfishi i pritshmërisë, përcjell albinfo.ch.

Tregjet dhe analistët projektonin një rritje në 170 mijë dhe normën e papunësisë të mbetej e pandryshuar në 3.9%.

Janari shënon muajin e 100-të me radhë në rritje për tregun e punës, që është edhe seria më e gjatë në historinë e Shteteve të Bashkuara të Amerikës. Titujt qeveritarë, por edhe aksionet u rritën ndjeshëm menjëherë pas publikimit të këtyre të dhënave.