Së shpejti, internet gratis në stacionet hekurudhore

Ndërkohë që pajisja me internet pa pagesë në stacione hekurudhore është pjesë e strategjisë së SBB-së, qasja në internet në trena ende nuk duket në horizont

Nga mesi i vitit 2014, 31 stacionet më të mëdha hekurudhore të Zvicrës do të ofrojnë qasje në internet pa pagesë. Sipas strategjisë së SBB/CFF (Ndërmarrjes Hekurudhore Federale), lidhja gratis do të mund të shfrytëzohet vetëm 30 minuta ndërsa pas kalimit të këtij limiti, shfrytëzimi i internetit bëhet me pagesë.

Në muajin shkurt SBB kishte paralajmëruar se synon që deri në fund të vitit 2015 t`i pajisë me WLAN pa pagesë 100 stacionet kryesore të trenave në Zvicër. Kështu, lajmi i kumtuar sot është fillim i realizimit të këtij premtimi.

Ndërkohë që pajisja me internet pa pagesë në stacione hekurudhore është pjesë e strategjisë së SBB-së, qasja në internet në trena ende nuk duket në horizont. Kjo është e pamundur të ofrohet në një kohë ë afërme, për shkaqe teknike, thonë në SBB.

“Swisscom” aktualisht operon në 31 pikat më të mëdha stacionesh hekurudhore në Zvicër.

Qasja në internet do të jetë e thjeshtë, njëherë do të regjistroheni dhe do të keni vazhdimisht internet kur t’i afroheni stacionit të caktuar. Tashmë po implementohen projektet testuese në stacione të vogla. Nga shtatori, SBB do të bëjë të njohur në mënyrë specifike se ku mund t’i qaseni falas internetit me Wi-Fi.