Rrëfimi i Kolollit: Puna në McDonald’s, kikboksi, Kosova dhe Challandes

Futbollisti i Kosovës dhe Zurichut, Benjamin Kololli në një intervistë për mediat zviceranë ka treguar për karrierën e tij jo të zakonshme prej futbollisti

Benjamin Kololli po shkëlqen këtë sezon në Zvicër me Zurichun, derisa është një nga futbollistët më të dalluar në Përfaqësuesen e Kosovës.

Në një intervistë për “NZZ”, ka rrëfyer për jetën dhe karrierën e tij, përcjell albinfo.ch.

Fillimisht foli për rastet me Covid-19 në skuadrën e tij, Zurich. “Isha i befasuar sepse kishin vetëm një simptomë ose asnjë. Ata janë të gjithë mirë dhe shpresoj se do ta kalojnë sa më shpejt këtë situatë. Isha i tronditur për këtë situatë. Shëndeti u pa se sa i rëndësishëm është”, u shpreh Kololli.

Por, ai nuk ka pasur një karrierë të zakonshme. “Karriera ime nuk është e zakonshme për një lojtar futbolli. Kur isha 17-vjeçar ndalova së luajturi futboll dhe fillova të merrem me kikboks. Kur u mbyll klubi i kikboksit, fillova të merrem sërish me futboll. Gjithashtu kam punuar në një diskotekë, te gardëroba, si dhe në kuzhinë në McDonald’s. Isha në praktikë për 3 muaj, por isha zënë me shefin dhe e lashë”, shton tutje ai.

Benjamini ishte akuzuar se është homofobik, por ka thënë se është keqkutpuar.

Kosova ka shumë rëndësi për të. “Është vendi im. Kombëtarja më afroi edhe më shumë, sepse e vizitoj më shpesh. Më herët shkoja një herë në vit, tash 4-5 herë. Edhe babai im ishte portier në Kosovë, por ai duhet të udhëtonte me dhjetëra kilometra për stërvitje. Edhe dy vëllezërit më të mëdhenj luajnë futboll”, nënvizon Kololli.

Anësori i majtë nuk e fsheh një dialog me Bernard Challandesin. “Unë ia kam thënë shumë herë trajnerit Challandes që nuk jam i kënaqur me pozicionet që më ka vendosur në fushë. Çfarë më ka thënë? Që duhet të ndihmoj ekipin. Jam përpjekur, pavarësisht pozicionit. E kam treguar te Zurich ku mund të jap më të mirën. Është e vërtetë që Challandes ka karakter të fortë, por është gjithashtu një person shumë mirëkuptues. Është një trajner që ka shumë përvojë”, u shpreh ndër të tjera Benjamin Kololli.

---