Rrahet e kërcënohet me jetë bashkatdhetari

Vetëm pse kishte parkuar veturën gabimisht, Ilir Hasanaj është rrahur e kërcënuar me jetë nga një polic në Kosovë

Një bashkatdhetar, i cili erdhi nga Franca për të pushuar në Kosovë, nuk ka kaluar shumë mirë.

Ilir Hasanaj nga fshati Raptishë e Poshtme e Deçanit, është keqtrajtuar nga një polic i këtij rajoni. Rastin e ka treguar prindi i tij Asllan Hasanaj, raporton “KTV”.

Sipas Asllanit, 62-vjeçar, djali i tij është rrahur e kërcënuar, vetëm pse e kishte parkuar veturën gabimisht. E tërë ngjarja kishte ndodhur më 23 qershor, përcjell albinfo.ch.

Ofendimet që ia kishte bërë polici, duke e shoqëruar në polici, janë të incizuara.

Por, kjo nuk ka përfunduar me kaq, pasi mësohet se polici e ka kërcënuar më pas me vrasje bashkatdhetarin, i cili jeton në Francë. Rasti është paraqitur edhe në Inspektoratin Policor të Kosovës.