Rënie rekorde e numrit të martesave

Enti i statistikave ka konstatuar rënie edhe në numrin e shkurorëzimeve dhe të lindjeve ndërkohë që numri i vdekjeve gjatë vitit 2013 ka shënuar rritje

Martesat në Zvicër nuk kanë qenë kurrë më pak „në modë“ se gjatë vitit 2013. 39500 çifte i kanë thënë po njëri tjetrit, që është për 7.5 për qind më pak se një vit më parë, njofton Enti Federal për Statistika. Kjo paraqet rënien më të madhe të shënuar brenda vitit, që nga vitet e shtatëdhjeta. Ndërsa numër i ngjashëm i vogël i kurorëzimeve është regjistruar për herë të fundit edhe në vitin 2004, pra dhjetë vite më parë.

Enti i statistikave ka konstatuar po ashtu rënie edhe në numrin e shkurorëzimeve dhe të lindjeve ndërkohë që numri i vdekjeve gjatë vitit 2013 ka shënuar rritje.

Numri i shkurorëzimeve ka qenë 17000 që është për 500 më i vogël se një vit më parë.

Statistikat më të reja tregojnë edhe numrin e martesave brenda të njëjtës gjini. 690 martesa të tilla janë realizuar gjatë vitit 2013, që përbën një numër stabil, pothuaj të pandryshuar në kraasim me një vit më parë.

Meshkujt kanë lidhur mes vete 460 martesa të tilla që është afërsisht dy herë më shumë se numri i martesave të lidhura në mes të femrave.