Prokuroria në Hagë kërkon ndalim vizitash për Thaçin nga 14 persona, përfshirë tre vëllezërit

Për më shumë se një vit e gjysmë, ish-presidenti i Kosovës Hashim Thaçi gjendet në paraburgim me regjim të kufizuar vizitash vetëm 5 takime në muaj me miq e të afërm, përveç familjes së ngushtë. Megjithatë, Zyra e Prokurorit të Specializuar (ZPS) ka kërkuar që Thaçit t’i ndalohen krejtësisht vizitat nga 14 persona, mes tyre vëllezërit Gani, Nazmi dhe Blerim Thaçi.

Sipas ZPS, disa vizitorë të konsideruar “të rrezikshëm” ende e takojnë Thaçin, duke ruajtur mundësinë e përcjelljes së mesazheve të paautorizuara. Si provë përmendet një video-thirrje e shkurtit 2025 mes Thaçit dhe të akuzuarit Haxhi Shala.

Mbrojtja e Thaçit, përfaqësuar nga avokatja Sophie Menegon, kundërshton kërkesën, duke theksuar se nuk ka prova të reja dhe se vetëm 5 nga 14 personat e listës e kanë vizituar pas vendosjes së masave në nëntor 2023. Ajo nënvizon se disa prej tyre janë miq të ngushtë ose pjesë e ekipit mbrojtës, me vizita të autorizuara.

Gjyqtarja e procedurës paraprake ka kërkuar informacion shtesë për një nga personat në listë para se të marrë vendim. Në listë figurojnë gjithashtu Artan Behrami dhe Vllaznim Kryeziu, të përmendur në aktakuzën e dytë ndaj Thaçit për tentim pengimi të drejtësisë