Presidentja e Kosovës merr pjesë në shënimin e 10-vjetorit të Grave Lidere në Politikë

Presidenca e Kosoves

Presidentja e Republikës së Kosovës, Vjosa Osmani, po qëndron në New York, ku po mbahet Sesioni i 78-të i Asamblesë së Kombeve të Bashkuara. Ajo mori pjesë në një ceremoni, në të cilën u shënua 10-vjetori i Grave Lidere në Politikë.

Në një adresim para grave të tjera lidere, Presidentja Osmani foli për angazhimin dhe rolin e shquar të grave në epoka të ndryshme të historisë së zhvillimit të vendit. Ajo theksoi se Kosova, në 15 vjetët e pavarësisë së saj, shquhet për lidership të grave në politikë, teksa potencoi rëndësinë e bashkëpunimit dhe rrjetëzimit të vazhdueshëm me qëllim të fuqizimit të grave në jetën publike, përcjell albinfo.ch.

Presidentja Osmani në adresimin e saj theksoi se Kosova po dëshmohet si vend lider në udhëheqjen e Agjendës për Gratë, Paqen dhe Sigurinë dhe potencoi se fuqizimi i grave në fushën e sigurisë, si dhe në fusha të tjera, është mundësia më e mirë për ta avancuar shoqërinë në tërësi, thuhet në komunikatën e Presidencës së Kosovës.