Porsche shkurton edhe 5.000 vende pune deri në vitin 2035

Prodhuesi gjerman i automobilave luksozë Porsche ka njoftuar se do të shkurtojë edhe 5.000 vende pune deri në vitin 2035, si pjesë e një programi të ri kursimesh për të përballuar krizën financiare.

Me këtë vendim, së bashku me shkurtimet e paralajmëruara më herët, numri i përgjithshëm i vendeve të punës që do të reduktohen arrin në 8.900. Kompania theksoi se procesi do të realizohet përmes pensionimeve, largimeve vullnetare dhe moszëvendësimit të punonjësve që largohen, pa pushime nga puna për arsye ekonomike.

Porsche, pjesë e Grupit Volkswagen, po përballet me rënie të fitimeve dhe sfida të mëdha në industrinë evropiane të automobilave. Krahas masave të kursimit, kompania do të investojë 2,1 miliardë euro në dy fabrikat e saj në Gjermani për të ruajtur prodhimin dhe zhvillimin e modeleve në afatgjatë.