Policia franceze prangosi prindërit në sy të fëmijëve

Rrethanat e dëbimit i tronditën banorët francezë. "Prindërit e familjes u prangosën në sy të fëmijëve. Më i riu nga ta, një foshnje katërmuajshe, ishte i sëmurë"

Fati i familjes shqiptare Gjata i datës 10 maj, e ka tronditur Shoqatën franceze “Kolektivi i solidaritetit me refugjatët” në Gérardmer të Francës. Asaj dite, familja shqiptare me katër fëmijë u arrestua nga policia, ndërsa kanë qenë në vizitë tek disa miq. Të nesërmen, me avion u dërguan në vendlindjen e tyre.

Rasti ndodhi në Gironcourt-sur-Vraine. Ky rast e sensibilizoi kolektivin nga Gérardmer, i cili është i shqetësuar për familje të tjera shqiptare e kosovare, të vendosura në Gérardmer tashmë disa vite, shkruan “Vosgesmatin”, përcjell Albinfo.ch. Këta të fundit janë në të njëjtën situatë: Të drejtat e tyre për azil janë refuzuar nga autoritetet franceze dhe rrezikohen të dëbohen nga Franca.

Një takim urgjent i kolektivit është mbajtur të mërkurën për ta tejkaluar situatën dhe për të organizuar aksione që do të evitonin dëbimin e familjeve të strehuara nëpër hotele.

Rrethanat e dëbimit i tronditën banorët francezë. “Prindërit e familjes u prangosën në sy të fëmijëve. Më i riu nga ta, një foshnje katërmuajshe, ishte i sëmurë”, rrëfejnë nga kolektivi, të cilët llogarisin se “policia nuk ka urdhërarrest ndaj kësaj familje. Ata gjithashtu e urrejnë “mungesën e humanizmit” në veprimin e tyre.

Pra, ata duan të veprojnë, të mobilizohen dhe të sensibilizojnë oipnionin e të mos hasin në veshë të shurdhër.

Gjatë ditëve të ardhshme, kolektivi pret të dëgjohet nga kryetari i komunës. ”Në Gérardmer, refugjatët kërkojnë dhe ndonjëherë gjejnë punë që të mos jenë barrë e shtetit. Por, ata pengohen të punojnë nga autoritetet”, ka spjeguar një anëtar i kolektivit, i shqetësuar për familjet.