Polici dënohet me gjobë, ka shqelmuar vjedhësin e arrestuar

Dëshmitë e filmuara janë marrë si bindëse dhe kanë bërë që polici të dënohet për shkaktim të lëndimit të lehtë dhe për keqpërdorim të detyrës zyrtare

Një polic nga Lucerni ka shqelmuar disa herë personin e kapur në vjedhje në një shitore orësh dhe e gjithë kjo është xhiruar nga kamerat vëzhguese të instaluara në dyqan. Dëshmitë e filmuara janë marrë si mjaft bindëse dhe kanë bërë që polici të dënohet për shkaktim të lëndimit të lehtë dhe për keqpërdorim të detyrës zyrtare.

Ngjarja ka ndodhur në qershorin e vitit të kaluar kur vjedhësin, të cilin tashmë e kishte arrestuar, polici në fjalë po e godiste disa herë me shqelma.

Nga filmimet e bëra me këtë rast, emisioni i njohur i televizionit publik të Zvicrës “Rundschau” kishte emetuar disa inserte. Kjo e kishte bërë këtë shkelje ligji më të njohur për opinionin.

Polici nga Lucerni është dënuar nga një gjykatë e këtij qyteti me një dënim me kusht e para si dhe me një gjobë prej 1000 frangash.