Përurohet memoriali në kujtim të shqiptarëve të dëbuar nga Kosova

Në Kosovë është përuruar memoriali përkujtimor kushtuar qindra mijëra shqiptarëve të cilët u dëbuan nga Kosova gjatë sulmit të Serbisë në vitin 1999.

Vepra është ndërtuar në Bllacë pranë kufirit të Kosovës me Maqedoninë e Veriut, ku ndodhej edhe ish-kampi i refugjatëve i cili dikur priti  440,000 njerëz që largoheshin nga persekutimi serb, shkruan Euronews, përcjell albinfo.ch

Në ceremoninë e përurimit morën pjesë rreth 50 njerëz si pasojë e masave anti-COVID.

“Ky është muri i kujtimeve tona, që përfaqëson dhembjen e 440 mijë njerëzve që kaluan këtu në vitin 1999 pas krizës humanitare dhe ndërhyrjes së forcave progresive për të ndaluar zhdukjen e një popullsie të tërë”, u shpreh Jahja Luka, përfaqësues i një shoqate refugjatësh.

Memoriali ka në qendër një mozaik, figura kryesore e të cilit është Sherife Ljuta, e cila shfaqet duke i dhënë gji foshnjës së saj, ndërsa me mijëra refugjatë të tjerë ecin pas saj.

“Më kujtohet atë ditë, me vajzën në krahët e mi, mijëra refugjatë që ecnin të lodhur, pa ngrënë ose pa pirë dhe unë me vajzën (time) në krahë, duke e ushqyer me gji, në një udhëtim pa ndërprerje”, u shpreh ajo.

Rreth 850 mijë shqiptarë të Kosovës u detyruan të braktisin shtëpitë e tyre gjatë luftës me Serbinë.