Për kë do të votojnë shqiptarët të dielën në Austri?

Deklaratat e kandidatit të djathtë Hofer kundër Pavarësisë së Kosovës dhe orientimi i tij politik radikal, duket se kanë bërë që shumica e shqiptarëve me të drejtë vote të përcaktohen për kandidatin Van Der Bellen

Austriakët do t’u drejtohen për herë të dytë brenda këtij vitin qendrave të votimit, për të zgjedhur presidentin e ardhshëm të vendit. Në garë janë kandidati i pavarur Alexander Van Der Bellen dhe përfaqësuesi i të djathtës ekstreme, Norbert Hofer.

Ashtu si në muajin maj, edhe këtë herë gara mes dy kandidatëve është e ngushtë. Në zgjedhjet e zhvilluara muaj më parë, u shpall fitues pro-evropiani Van Der Bellen, por rezultati u anulua nga Gjykata Supreme Austriake pasi u identifikuan parregullsi në sistemin e numërimit dhe u vendos përsëritja e zgjedhjeve.

Deklaratat e kandidatit të djathtë Hofer kundër Pavarësisë së Kosovës dhe orientimi i tij politik radikal, duket se kanë bërë që shumica e shqiptarëve me të drejtë vote të përcaktohen për kandidatin Van Der Bellen, shkruan “albinfo.ch”.

Aktivisti i shquar i komunitetit shqiptar në Austri dhe ish kandidati për parlamentin e Landit të Vjenës, Januz Saliuka thotë se shqiptarët në Austri pa asnjë mëdyshje do të votojnë për kandidatin Van Der Bellen. “Për komunitetin shqiptar nuk ka mëdyshje. Norbert Hofer si kandidat për president gjithnjë ka përsëritur se ishte kundër Pavarësisë së Kosovës,  njëherësh orientim i tij politik është radikal – nacionalist, kështu që Van der Bellen është i preferuari i shqiptarëve pasi që ai ruan konceptin evropian dhe mbështet politikat sociale” thotë Saliuka.

“Nëse synojmë që edhe ne te jemi pjesë e familjes evropiane ku respektohen liritë dhe të drejtat kolektive dhe individuale pa dallim, ku synohet paqja në mes njerëzve, atëherë duhet të zgjedhim Van Der Bellen”, shton ai për “albinfo.ch”.

Ndërkohë edhe asambleiisti shqiptar në qytetin Ebensee, Lulëzim Fejzullahu u bën thirrje shqiptarëve që ta shfrytëzojnë të drejtën e tyre dhe të dalin të votojnë ditën e diel. “Nuk duhet të qëndrojmë indiferent ndaj këtyre zgjedhjeve. Duhet ta shfrytëzojmë të drejtën e votimit  dhe të votojmë për të ardhmen tonë dhe për integrimin më të mirë të komunitetit tonë në Austri”, shprehet Fejzullahu për gazetën tonë.

Fejzullahu është i bindur se shqiptarët do të votojnë për kandidatin Van Der Bellen. “Bellen është njeri i sinqertë, punëtor dhe njeri evropian. Duke votuar Bellen, do të votojnë për të ardhmen e tyre më të mirë në Austri”.

Sidoqoftë, se cili kandidat do të jetë fitues i këtyre zgjedhjeve do ta mësojmë ditën e diel, me  4 dhjetor.