Papunësia në shkurt, pa ndryshime: 3.5%

Shkalla e papunësisë në Zvicër ka mbetur stabile edhe gjatë shkurtit, përkundër ndryshimit të kursit të frangut kundrejt euros, që ka ndodhur nga mesi i muajit janar. 3.5 për qind ka qenë kjo shkallë në fund të muajit shkurt, ka njoftuar sot  Sekretariati Shtetëror për Ekonomi (SECO). Sipas tij, edhe një vit më parë ka qenë e njëjta shkallë, pra 3.5% e papunësisë.

Përkthyer në shifra absolute, në fund të shkurtit në Zvicër ishin të regjistruar 149.921 njerëz të papunë, ose 1025 më pak se në janar. Ndërkaq, në krahasim me shkurtin e një viti më parë kishte një ngritje të vogël, prej 662 vetave të papunë, numër që nuk ndikon në përqindje.

Numri i të rinjve të papunë, (nga 15-24 vjeçarë) është zvogëluar për 470, duke rënë në 19.041 sish.

Edhe pse ndryshimi i kursit të frangut nuk ka pasur ndikim të drejtpërdrejtë në shtimin e numrit të papunëve, ai ka pasur një ndikim tjetër, më specifik. Si pasojë e rrethanave të krijuara, disa ndërmarrje të varura nga eksporti, kanë filluar të praktikojnë më shumë orare të shkurtuara të punës. Kështu, përderisa në dhjetor ishin vetëm 211 ndërmarrje që kishin ofruar punë me orar të pjesshëm, në fund të shkurtit k numër u ngrit në 600 ndërmarrje.

Krahasuar me vitin 2009, kur  Zvicra kishte filluar të ndjente krizën financiare botërore,  gjendja aktuale nuk është aq e keqe. Këtë e tregon statistika sipas të cilës në shkurt të vitit 2009 ishin 1505 ndërmarrje që kishin kaluar në punë të pjesshme, që është pothuaj trefish më shumë se në shkurt 2015.