Osmani pret përfaqësuesit e NATO-s, falënderon gjeneralin Sven Lange për kontributin në Kosovë

Presidentja e Republikës së Kosovës, Vjosa Osmani, ka pritur në takim drejtorin në largim të Ekipit Këshillues dhe Ndërlidhës të NATO-s (NALT), gjeneral brigade Dr. Sven Lange, si dhe përfaqësuesen e NATO-s Blanca Hereza Atienza, përcjell albinfo.ch.

Gjatë takimit, Osmani shprehu mirënjohje për angazhimin e vazhdueshëm të NATO në ruajtjen e sigurisë dhe stabilitetit në Kosovo. Ajo vlerësoi gjithashtu rolin e rëndësishëm të NALT-it në zhvillimin e institucioneve të sigurisë dhe mbrojtjes në vend.

Presidentja theksoi se mbështetja e NATO-s ka qenë veçanërisht e rëndësishme në zhvillimin dhe profesionalizimin e Forcës së Sigurisë së Kosovës, duke kontribuar drejtpërdrejt në forcimin e kapaciteteve profesionale dhe institucionale të Kosovës.

Me këtë rast, Osmani vlerësoi punën dhe përkushtimin e gjeneral brigade Dr. Sven Lange, i cili po përmbyll mandatin e tij njëvjeçar si Drejtor i NALT-it. Në emër të institucioneve dhe qytetarëve të Kosovës, ajo e falënderoi për kontributin në forcimin e bashkëpunimit ndërmjet Kosovës dhe NATO-s.

Në fund të takimit, presidentja ritheksoi përkushtimin e Kosovës për paqe, stabilitet dhe për vlerat euroatlantike, si dhe aspiratën për integrim në NATO./Albinfo.ch