Osmani për BBC: Kosova ka përvojën se si ndërtohet paqja

EPA/TOMS KALNINS

Presidentja e Kosovës, Vjosa Osmani, ka deklaruar në një intervistë për BBC se Kosova e di se si arrihet paqja, falë përvojës së saj të dhimbshme historike dhe mbështetjes së fuqishme ndërkombëtare.

Ajo tha se ka arsye të shumta pse Kosova është bërë pjesë e Bordit të Paqes të presidentit amerikan Donald Trump, ku Osmani është një nga lideret botërore të përfshira në këtë mekanizëm.

Duke u kthyer pas në kohë, Osmani kujtoi se 26 vjet më parë Kosova ishte e shkatërruar nga lufta dhe se populli i saj ishte përballur me gjenocid. Sipas saj, ndërhyrja e Shteteve të Bashkuara, me përkrahjen e Mbretërisë së Bashkuar dhe vendeve të tjera demokratike, ishte vendimtare për shpëtimin e jetëve dhe hapjen e rrugës drejt paqes, lirisë dhe pavarësisë.

Në intervistë, Osmani theksoi se sot Kosova është shtet sovran, demokratik dhe i pavarur, ndërsa fëmijët e saj janë brezi i parë që po rritet pa e përjetuar luftën dhe po shijon paqen.

Ajo nënvizoi se paqja nuk arrihet vetëm me fjalë apo rezoluta, por me veprim konkret. Duke folur për përvojën e saj personale si fëmijë lufte, Osmani tha se atëherë kishte shumë deklarata ndërkombëtare, por mungonte veprimi deri në momentin kur SHBA-ja ndërhyri dhe mobilizoi botën për Kosovën.

Presidentja shtoi se ekziston dallim mes krijimit të paqes dhe ruajtjes së saj, duke theksuar nevojën për organizata të fuqishme që merren me ndërtimin e paqes, ndërsa OKB-ja, sipas saj, ka një rol të rëndësishëm në ruajtjen e paqes, rol që e ka luajtur edhe në Kosovë për më shumë se një dekadë.

E pyetur nëse këto iniciativa synojnë ta zëvendësojnë OKB-në, Osmani e mohoi një gjë të tillë, duke theksuar se organizatat ndërkombëtare mund dhe duhet të bashkëpunojnë, secila në rolin e vet, për arritjen dhe mbajtjen e paqes.