Kartoni i gjelbër, do të lehtësonte punën e bizneseve

Drejtuesit e Odës së Afarizmit të Kosovës kanë takuar ministrin e Financave, Bedri Hamza, me të cilin kanë diskutuar për marrjen e Kartonit të gjelbër, për mosklasifikimin e bizneseve nga institucionet dhe Ligjin për Falimentimin. 

Sipas OAK, qëllim i këtij takimi ishte shprehja e shqetësimeve për pengesat e të bërit biznes në vend, ku si rezultat tyre Kosova po vazhdon me rritje të papunësisë dhe moszhvillim të madh në krahasim me rajonin.

“Kosova është nga pak vende të cilat nuk kanë Ata Carnet (Kartonin e gjelbër), i cili lejon hyrjet e përkohshme të një produkti pa qenë e nevojshme të bëhet doganimi i përkohshëm. Marrja e Kartonit të gjelbër është në favor të krijimit të një klime më të mirë për bizneset, pasi që u lejon të marrin produktet, t’i testojnë, e pastaj të vendosin se a do t’i importojnë ose jo”, theksoi kryetari i Bordit të OAK, Skënder Krasniqi. 

Ndërsa ministri Hamza përgëzoi Odën për punën e bërë deri më tani, duke shtuar që është i hapur për ide dhe rekomandime për të gjitha draftligjet që Ministria e Financave i nxjerr.