Raport: Zvicra duhet të reformojë sistemin e kujdesit për fëmijët

OECD kërkon zgjerim të kapaciteteve dhe ulje të kostove, të cilat konsiderohen ndër më të lartat në botë.

Në një raport të ri të publikuar të enjten, Organizata për Bashkëpunim dhe Zhvillim Ekonomik (OECD) rekomandon që Zvicra të forcojë dhe zgjerojë ofertat për kujdesin ndaj fëmijëve, si dhe të ofrojë mbështetje më të madhe financiare për prindërit, përcjell albinfo.ch.

Sipas raportit, kostot e kujdesit për fëmijët në Zvicër janë ndër më të lartat në botë, gjë që krijon pengesa për punësim, veçanërisht për gratë.

Gjithashtu, vendi përballet me mungesë të kapaciteteve në të gjitha rajonet, duke e bërë të vështirë aksesin në shërbimet e kujdesit për fëmijët.

Megjithatë, raporti thekson se Zvicra ka ndërmarrë tashmë disa hapa në këtë drejtim. Konkretisht, çështja e përballueshmërisë së kujdesit për fëmijët aktualisht po trajtohet në parlamentin zviceran./Albinfo.ch

---