Numra rekordë pasagjerësh në aeroportet zvicerane

Aeroporti i Cyrihut në Kloten, gjatë vitit 2010 ka bartur 23 milion udhëtarë ose 4 për qind më shumë se një vit më parë

Vitin e kaluar, aeroportet më të mëdha ndërkombëtare të Zvicrës kanë shënuar rekord në numrin e pasagjerëve dhe në vëllimin e mallrave të transportuara.

Kjo ka ndodhur përkundër kushteve të rënduara të afarizmit që kanë mbretëruar vitin e kaluar, të shkaktuara nga retë e hirit në fillim të vitit dhe nga shpërthimi i hershëm i dimrit, në fund të vitit.

Kështu, Aeroporti më i madh i vendit, ai i Cyrihut në Kloten, gjatë vitit 2010 ka bartur 23 milion udhëtarë ose 4 për qind më shumë se një vit më parë.

Aeroporti i dytë për nga madhësia, ai i Gjenevës, ka pasur 12 milionë pasagjerë ose 5% më shumë se para një viti ndërsa i treti, aeroporti i Bazelit, ka shënuar një numër prej rreth 4 milionë udhëtarësh, ndryshe 7% më shumë, po u krahasua me vitin 2009.