Nuk vjen fluksi i madh i pritur i refugjatëve në Zvicër

20minuten.ch

Ndërkohë që policia në pikën e hyrjes nga Austria ne Zvicër, në stacionin hekurudhor të qytetit Buchs (Kantoni St. Gallen) ishte përgatitur për një fluks të madh të refugjatëve nga Hungaria, një tren i ardhur ka sjellë gjithsej 4 refugjatë sirianë.

Policia njofton se, siç transmeton 20minuten.ch nga vendi i ngjarjes, treni i pritur “Wiener Walzer” i nisur nga Hungaria është ndaluar në Austri për t`u kontrolluar. Disa nga refugjatët janë bartur nga ky tren në një tren tjetër të rregullt me të cilin janë rrugës për në Buchs, Zvicër. Kjo është arsyeja përse policia tashmë pret se numri i të ardhurve do të jetë dukshëm më i ulët se që ishte menduar.

Gjithsej 10 veta pritet të vijnë me këtë tren kështu që “invazion” refugjatësh njëherë për njëherë nuk duket se do të ketë.

Agjencitë e lajmeve njoftojnë po ashtu se sot paradite autoritetet hungareze kanë ndaluar udhëtimin e refugjatëve nga Budapesti me trena drejt perëndimit. Kjo ndalesë thuhet të vlejë “deri në urdhrin e ardhshëm”, ndërsa refugjatët protestojnë të revoltuar në stacionet hekurudhore për faktin se kanë paguar biletat e rrugës e tash u ndalohet të udhëtojnë.