Në Vjenë, Pavarësia e Kosovës u festua me muzikë të mirëfilltë shqiptare

Për argëtimin e të pranishmëve ishte ftuar grupi nga Gjakova „Don’t Listen to Your Neighbors“, të cilët me stilin e tyre „jazz“ sollën para të pranishmëve muzikë të vjetër shqipe

Mbi 200 shqiptarë, kryesisht rini që jetojnë në Vjenë, u mblodhën të premten në mbrëmje për të festuar dhe kremtuar 12-vjetorin e Pavarësisë së Kosovës.

Nën organizimin e Këshillit Koordinues të Shoqatave Shqiptare në Austri dhe me përkrahjen e Ministrisë së Diasporës të Republikës së Kosovës dhe Europahaus, shqiptarët në Vjenë, kaluan një mbrëmje të paharruar me muzikë të mirëfillta shqipe, shkruan albinfo.ch.

Për argëtimin e të pranishmëve ishte ftuar grupi nga Gjakova „Don’t Listen to Your Neighbors“, të cilët me stilin e tyre „jazz“ sollën para të pranishmëve muzikë të vjetër shqipe.

Programi muzikor i tyre filloi me këngët „O vendi im“, „Shok mu bane“ për të vazhduar me pas me këngë më ritme më të gjalla si: „Lule lule“, „Margjelo“ e shumë të tjera, të cilat bashkë me grupin këndoheshin edhe nga publiku.

Festa e Pavarësisë ishte organizuar në një nga lokalet e njohura „Tunnel Vienna live“ në Vjenë.

Për nder të Festës së 17 Shkurtit në Austri gjatë tërë javës do të këtë aktivitete të ndryshme kulturore dhe sportive të organizuar nga komuniteti shqiptar që jetojnë në këtë shtet.

 

---