Në trenat gjermanë, konduktorët do të bëjnë kontrollimin e certifikatës

Sipas një zëdhënëseje të Deutsche Bahn, kontrollimi në tren është bërë edhe më herët, që nga futja e rregullit 3G, por ai nuk kryhej nga konduktorët

Në Ndërmarrjen Federale të Hekurudhave të Gjermanisë, Deutsche Bahn, nga e mërkura, 8 dhjetor, konduktorët kanë për detyrë të kontrollojnë edhe certifikatat 3G.

Nuk do të ketë kontrollim të të gjithëve por sipas parimit të rastësisë, shkruan srf.ch.

Pasagjerëve të cilët nuk kanë me vete dëshmi testimi, vaksinimi ose shërimi (3G) duhet t’u kërkohet “me maturi dhe mirësjellje” të zbresin në stacionin tjetër qendror, raporton paraprakisht rrjeti editorial i Gjermanisë.

Ky rrjet citon udhëzimet e brendshme nga DB Regio, transmeton albinfo.ch.

Në rast refuzimi, duhet të thirret Policia Federale.

Sipas një zëdhënëseje të Deutsche Bahn, kontrollimi në tren është bërë edhe më herët, që nga futja e rregullit 3G, por ai deri më tani nuk kryhej nga konduktorët.

“Në transportin lokal ne kemi rënë dakord me këshillat e punës që konduktorët në trenat RE dhe RB të përfshihen gjithashtu në testin 3G. Ekuipazhi i trenit do të mbështetet nga personeli i sigurisë”, ka thënë zëdhënësja.

---