Shqipëri, katër raste të reja me koronavirus në 24 orët e fundit, dy prej tyre mjekë

(Claudio Furlan/LaPresse via AP)

27 persona të dyshuar, qytetarë dhe personel, janë testuar në Shqipëri në 24 orët e fundit, nga ana e Institutit të Shëndetit Publik, katër prej të cilëve janë konfirmuar të infektuar me koronavirus.

Dy prej rasteve të reja janë mjekë të spitalit “Shefqet Ndroqi” në Tiranë, është bërë e ditur.

Rrjedhimisht, numri i të infektuarve me COVID-19 në Shqipëri ka shkuar në 42.

Deri në këto momente janë testuar 532 raste të dyshuara.

Ministria e Shëndetësisë ka thënë se deri tash në Tiranë janë të infektuar 26 persona, në Durrës 5 raste, njëri prej të cilëve ka vdekur, në Lushnje 2 raste, Elbasan 2 raste, Fier 5 raste, Rrogozhinë 2 raste.

Po ashtu ëeshtë bërë e ditur se tre prej këtyre rasteve janë në terapi intensive: një 66-vjeçar nga Lushnja dhe një 61-vjeçare nga Fieri dhe një 50-vjeçar nga Tirana, përcjell Albinfo.ch.