Në Gjenevë organizohet konferencë kushtuar Ditës Ndërkombëtare për Eliminimin e Dhunës Seksuale në Konflikte

Më 13 qershor 2026, në ora 19:00, në Ecole du Bosson – Aula, Av. du Bois-de-la-Chapelle 90, 1213 Onex në Gjenevë, do të mbahet konferenca kushtuar Ditës Ndërkombëtare për Eliminimin e Dhunës Seksuale në Konflikte.

Ngjarja organizohet nga shoqata “Zëri i Gruas LIRA”, me mbështetjen e Konsullata e Përgjithshme e Republikës së Kosovës në Gjenevë dhe do të sjellë në panel emra të njohur të institucioneve, diplomacisë, shëndetësisë dhe mbrojtjes së të drejtave të të mbijetuarve të dhunës seksuale gjatë luftës.

Pjesëmarrëset e konferencës janë: Vasfije Krasniqi Goodman – e deleguara e posaçme për çështjen e të mbijetuarave të dhunës seksuale gjatë luftës; Feride Rushiti – themeluese dhe drejtoreshë ekzekutive e Qendrës Kosovare për Rehabilitimin e të Mbijetuarve të Torturës (QKRMT); Floreta Kabashi Ademaj – udhëheqëse e Konsullatës së Përgjithshme të Republikës së Kosovës në Gjenevë; Leonora Selmani – kryetare e Komisionit Qeveritar për Njohjen dhe Verifikimin e Statusit të Personave të Dhunuar gjatë Luftës; Shqipe Shehu Brovina – psikiatre dhe psikoterapeute FMH, ish-shefe klinike në HUG dhe mjeke konsulente në HUG; si dhe Linda Rexhaj Maliqi – organizatore dhe themeluese e “Zërit të Gruas LIRA”.

Konferenca synon të nxisë reflektim dhe ndërgjegjësim mbi pasojat afatgjata të dhunës seksuale në konflikte, duke theksuar rëndësinë e drejtësisë, rehabilitimit dhe mbështetjes institucionale për të mbijetuarit.

Organizatorët kanë bërë të ditur se të interesuarit duhet të regjistrohen paraprakisht për pjesëmarrje përmes platformës: e-drejtajote.ch

Për albinfo.ch Luljeta Ademi