Prishtina pret Forumin e tretë Ekonomik Gjermano-Kosovar

Bashkëpunimi ekonomik, investimet dhe partneritetet mes bizneseve nga Kosova dhe Gjermania do të jenë në qendër të takimit dyditor në Hotel Emerald.

Forumi i tretë Ekonomik Gjermano-Kosovar do të mbahet më 28–29 tetor 2026 në Hotel Emerald, në Prishtinë, me organizim të Odës Ekonomike Gjermano-Kosovare.

Ngjarja synon të bashkojë përfaqësues të bizneseve, investitorë, politikëbërës dhe ekspertë për të diskutuar mundësitë e bashkëpunimit dhe krijimin e partneriteteve afatgjata mes dy vendeve, shkruan albinfo.ch.

Sipas organizatorëve, programi do të përfshijë diskutime në nivel të lartë, sesione sektoriale për investime, takime të organizuara mes bizneseve (B2B) dhe punëtori praktike.

Në fokus të këtij edicioni do të jenë transformimi digjital dhe inteligjenca artificiale, energjia dhe infrastruktura e qëndrueshme, si dhe prodhimi i avancuar dhe industria.

Pjesëmarrësit do të kenë mundësi të krijojnë kontakte me partnerë potencialë, të njihen me mundësitë për investime dhe të shkëmbejnë përvoja me ekspertë të sektorëve përkatës.

Regjistrimi është i hapur deri më 18 tetor 2026. Informacionet për programin dhe pjesëmarrjen gjenden në faqen zyrtare të Forumit.

---