Myslimanët, të integruar në tregun e punës por pak të pranuar nga shoqëria

Në krahasim me vendet  si Gjermania, Franca, Austria dhe Britania e Madhe, rezulton se myslimanët që jetojnë në Zvicër janë më mirë të integruar në tregun e këtushëm të punës

KEYSTONE

Një studim i realizuar nga fondacioni gjerman “Bertelsman” ka ardhur në përfundimin se myslimanët janë të integruar relativisht mirë në tregun e punës në shtetet e Evropës Perëndimore, edhe përkundër shkallës më të ulët të arsimimit që kanë.

Sa i përket Zvicrës, studimi ka konstatuar se 98 për qind të myslimanëve që jetojnë këtu e ndjejnë veten të lidhur me këtë vend, shkruajnë sot mediat zvicerane dhe gjermane. Në krahasim me vendet  si Gjermania, Franca, Austria dhe Britania e Madhe, rezulton se myslimanët që jetojnë në Zvicër janë më mirë të integruar në tregun e këtushëm të punës.

Në studim janë përfshirë myslimanët të cilët në Zvicër kanë ardhur para vitit 2010, transmeton albinfo.ch. Kriteret që janë vlerësuar me këtë rast janë: kompetenca gjuhësore, arsimimi, puna dhe kontaktet sociale.

Edhe në Gjermani, konstaton studimi, myslimanët në tregun e punës janë më mirë të integruar në krahasim me të huajt tjerë. Por, edhe këtu, ata janë fare pak të pranuar nga shoqëria. Këtë e tregon përgjigja e vendësve të shteteve të përfshira në studim, përcjell albinfo.ch.

Pra shtetasit e Gjermanisë, Zvicrës, Francës, Austrisë dhe Britanisë së madhe, të pyetur se kë do ta refuzonin si fqinj, janë përgjigjur në radhë të parë në dëm të myslimanëve. Pas tyre vijnë: familjet e shumë fëmijë, të huajt ose gastarbajterët, homoseksualët, hebrenjtë, njerëzit me ngjyrë tjetër lëkure, ateistët dhe në fund, të krishterët.