Kosovë: Ministri i Jashtëm flet për tërheqjen e taksës ndaj Serbisë

keystone

Ministri i Punëve të Jashtme i Kosovës, Behgjet Pacolli, ka thënë se duhet të analizohet vendimi për taksën.

Në një intervistë për RTK-në, Pacolli ka folur rreth kërkesave të Shteteve të Bashkuara të Amerikës për tërheqjen e vendimit për taksën ndaj Serbisë.

Sipas Pacollit, kryeministri i Kosovës, Ramush Haradinaj, nuk do të veprojë kundër SHBA-së.

“Do të doja që në mënyrë të qetë dhe pa e ofenduar askënd dhe pa shkuar kundër interesave edhe të miqve tanë, ta analizojmë mirë dhe të shikojmë. Unë nuk besoj që kryeministri Haradinaj do të bënte një veprim që shkon kundër interesave të Amerikës. Ne do të bisedojmë pse kjo taksë është vendosur dhe Serbia duhet të kushtëzohet”, ka thënë Pacolli.

Pacolli tutje tha edhe se njohja nga ana e Serbisë nuk do të jetë e lehtë, por kërkoi që produktet serbe të bojkotohen nga ana e shqiptarëve.

“E di që Haradinaj ka thënë se kur të ketë njohje nga Serbia, atëherë do ta heqim taksën. Deri te njohja duhet shumë punë, dhe kemi ardhur në një moment që Serbia e kushtëzon vazhdimin e dialogut me taksën. Do të doja që qytetarët të ishin ata që nuk i blejnë prodhimet serbe, mirëpo qeveria e ka marrë përsipër një punë të mundimshme dhe patate të nxehtë”, deklaroi Behgjet Pacolli.