Kryeministri i Kosovës, Albin Kurti, ka shprehur shpresën se ndryshimi i pushtetit në Serbi, pas zgjedhjeve parlamentare të 25 tetorit, do të ndikojë pozitivisht në qëndrimin e Beogradit ndaj Kosovës si shtet i pavarur, përcjell albinfo.ch.
Gjatë mbledhjes së 64-t të Këshillit të Përgjithshëm të Lëvizjes Vetëvendosje, Kurti ka komentuar rezultatet e zgjedhjeve në Serbi, ku Lista Studentore doli fituese, ndërsa koalicioni i Aleksandar Vuçiqit humbi shumicën parlamentare.
“Aktualisht, ne e dimë kush e ka humbur pushtetin në Serbi, por ende nuk e dimë kush e ka fituar atë”, ka deklaruar Kurti.
Ai ka theksuar se ndryshimet politike në shtetin fqinj duhet të shoqërohen edhe me një qasje të re ndaj Kosovës dhe shqiptarëve në Preshevë, Bujanoc dhe Medvegjë.
“Shpresojmë që ky ndryshim politik të shoqërohet edhe me ndryshimin pozitiv të qasjes së Beogradit zyrtar ndaj Republikës së Kosovës si shtet i pavarur dhe ndaj shqiptarëve në Preshevë, Bujanoc dhe Medvegjë si komunitet i diskriminuar”, është shprehur kryeministri.
Kurti ka folur edhe për rezultatin e Koalicionit Shqiptar në zgjedhjet parlamentare në Serbi, duke theksuar se ky subjekt ka siguruar 27.670 vota dhe dy mandate parlamentare.
Sipas tij, ky është rezultati më i mirë i përfaqësimit politik të shqiptarëve në Serbi që nga viti 2000.
Duke folur për të ardhmen e marrëdhënieve ndërmjet Kosovës dhe Serbisë, Kurti ka theksuar rëndësinë e ballafaqimit me të kaluarën, zbardhjes së krimeve të luftës dhe fatit të personave të zhdukur.
Ai ka vlerësuar se normalizimi i marrëdhënieve duhet të mbështetet në barazi, respekt të ndërsjellë dhe njohje reciproke.
Megjithatë, pavarësisht ndryshimeve politike në Serbi, qëndrimet e deritanishme publike të përfaqësuesve të Listës Studentore nuk tregojnë një ndryshim të qartë sa i përket njohjes së pavarësisë së Kosovës.
Përfaqësuesit e kësaj lëvizjeje kanë shprehur gatishmëri për vazhdimin e dialogut me Kosovën, por kanë mbajtur qëndrimin se Kosova është pjesë e Serbisë, në përputhje me Kushtetutën serbe.
Kosova dhe Serbia vazhdojnë të kenë marrëdhënie të tensionuara, ndërsa procesi i dialogut për normalizimin e marrëdhënieve, i ndërmjetësuar nga Bashkimi Evropian, ka shënuar pak përparim gjatë viteve të fundit./Albinfo.ch
