Meshkujt zviceranë jetojnë më së gjati në botë

Me një mesatare prej 81.3 vjetësh ata janë dukshëm mbi mesataren botërore që është 69.1 vjet

Nga viti 2000 deri në vitin 2015 jetëgjatësia në botë është rritur për pesë vite. Por, përkundër rritjes “dramatike”, vazhdojnë dallimet e mëdha në mes të vendeve të veçanta, bëhet e ditur në raportin përkatës të Organizatës Botërore të Shëndetësisë (WHO) të publikuar sot, njofton sda.ch

Por ajo që qet në pah ky raport nga pikëpamja zvicerane është jetëgjatësia rekorde e meshkujve zviceranë. Me një mesatare prej 81.3 vjetësh ata janë dukshëm mbi mesataren botërore që është 69.1 vjet, transmeton albinfo.ch. Në vitin 2012 kjo statistikë udhëhiqej nga islandezët.

Në fund të listës janë meshkujt e Sierra Leones, mesatarja e jetës së të cilëve nuk shkon mbi 49.3 vjet! Në këtë vend të Afrikës Perëndimore edhe jeta mesatare e femrës është më e ulëta në botë, gjegjësisht 50.3 vjet. Ndërsa jetëgjatësia mesatare e grave  japoneze, me 86.8 vazhdon të jetë më e larta të botë, përcjell albinfo.ch. Mesatarja botërore është 73.8 vjet.

Ndërsa gratë zvicerane, të cilat në vitin 2012 së bashku me spanjollet ishin në vendin e dytë pas japonezeve, në statistikën më të re zënë “vetëm” vendin e pestë. Mesatarja e jetës së tyre është 85.3 vjet.

Mesatarja në gjithë botën për të dy gjinitë është 71.4 vjet.