Lulzim Fejzullahi zgjidhet asambleist në Ebensee

Menaxher dhe pronari i hoteleve në Austrinë e Epërme ka siguruar ulësen për gjashtë vitet e ardhshme në Asamblenë e komunës Ebensee të Austrisë nga radhët e partisë SPÖ

Lulzim Fejzullahi, i riu nga Shtupeli i Klinës, sot kishte vetëm pak orë gjumë. Gjatë natës së mbrëmshme ai kishte dy festa. Përveç që festoi ditëlindjen e tij të 31-të, Lulzimi festoi edhe zgjedhjen këshilltar në asamblenë e komunës së Ebensee-s të Austrisë.

I njohur si një menaxher dhe pronar hotelesh në Austrinë e Epërme, tashmë djaloshi nga Klina ka të garantuar ulësen për gjashtë vitet e ardhshme në këtë komunë nga radhët e partisë  SPÖ (Partia Socialiste Austriake).

“Jam pakëz i lodhur për gjumë, sepse mbrëmë kemi festuar deri vonë, por sigurisht i lumtur”, thotë ai gjatë ditës së hënë për “albinfo.ch”.

Nga 74 asamblistë që ka komuna e Ebensee, SPÖ deri më tash ka pasur 18-të, por në këto zgjedhje ajo ka marrë edhe dy ulëse më shumë duke arritur numrin 20-të.  Lulëzimi është i 9-ti me vota nga partia e tij.

“Sa i përket komunës sonë, ne ndihemi shumë mirë që kemi pasur ngritje në këto zgjedhje, në krahasim me komunat tjera të cilat fatkeqësisht në këtë vit partia jonë ka pasur rënie”, thotë Fejzullahi i cili është i diplomuar për hoteleri.

Komuna Ebensee është një vend turistik ku nuk banojnë as pesë familje shqiptare, por integrimi i mirë i Lulzimit, puna e tij e shkëlqyer në menaxhimin e  hoteleve, miqësia e krijuar me vendësit dhe mbështetja e jashtëzakonshme nga kryetari i kësaj komune, Markus Siller, ka bërë që atë ta votojnë shumica absolute austriake.

“Mendoj se puna ime, integrimi dhe respekti i ndërsjellë ka qenë arsyeja që unë të votohem nga populli austriak”, shprehet Lulzimi, i cili në vitin 2003 kishte migruar për në Austri si emigrant ekonomik.

“Kam përfunduar shkollimin në drejtimin e hotelerisë. Një kohë kam punuar si kamerier dhe më pas kam hapur bizneset e mia. I kam dy lokale hoteliere dhe merrem edhe me ndërtime dhe prona. Po ashtu jam edhe profesor në një shkollë të mesme në këtë qytet”, thotë ai.

Si një profesionist i hotelerisë dhe mësues pranë BFI-së në synimet e tij është që të krijojë kushte më të mira dhe atraktive për turistë si dhe të hapë vende të reja të punës.

“Do të mundohem që këtë komunë ta bëjmë sa më joshëse dhe atraktive për turistë si dhe të hapim vende të reja të punës”, premton Lulzimi i cili është i martuar dhe baba i dy vajzave.