Lirohet njëri nga të dyshuarit për vrasjen e Ivanoviqit

Gjykata Themelore në Prishtinë, në mungesë të provave e liroi nga paraburgimi Dragisha Markoviq, i cili u arrestua tre muaj më parë në lidhje me hetimet për vrasjen e politikanit serb të Kosovës, Oliver Ivanoviq.

Atij iu shqiptua masa e paraqitjes së detyruar në qendrën policore, shkruan rel, përcjell albinfo.ch.

Dy të dyshuarve të tjerë, Nedeljko Spasojeviç dhe Marko Roshiq, iu zgjatet masa e paraburgimit edhe për dy muaj.

Në një deklaratë të shkurtër për gazetarë, Dragisha Markoviq tha se pas tre muajsh “drejtësia fitoi”.

Policia e Kosovës, në nëntor të vitit të kaluar, kishte arrestuar Dragisha Markoviq nën dyshimet se ka kryer veprën penale “ zbulim i sekretit zyrtar” në lidhje me vrasjen e Oliver Ivanoviqit.

Prokuroria Special e Republikës së Kosovës, më 24 janar, ka kërkuar nga Gjykata Themelore në Prishtinë që të lëshojë urdhërarrest për Millan Radoiçiq, si një prej personave të dyshuar për rastin e vrasjes së Oliver Ivanoviqit.

Politikani serb, Oliver Ivanoviq, ishte vrarë më 16 janar 2018 para selisë së partisë së tij në Mitrovicën Veriore. Ai ishte kryetar i Iniciativës qytetare “Liria, Demokracia dhe Drejtësia”.