Lëndohet rëndë sportistja gjatë përgatitjeve për “Lozana 2020”

Sipas Policisë Kantonale të Vaudit, ajo është dërguar në spital me lëndime me rrezik për jetën

Gjatë përgatitjeve për hapjen e Lojërave Olimpike Dimërore për të Rinj “Lozana 2020”, sot është aksidentuar një grua, shkruan srf.ch. Bëhet fjalë për 35-vjeçaren ruse, garuese në vrapim me patina, e cila është rrëzuar nga një lartësi prej pesë metrash në sallën e sporteve në akull, në Malley të Lozanës.

Sipas Policisë Kantonale të Vaudit, ajo është dërguar në spital me lëndime me rrezik për jetën.

Gjatë provave për prezantimin e saj, sportistja në fjalë është tërhequr lart nga një sistem unazash metalike, bën të ditur Policia Kantonale, transmeton albinfo.ch. Sistemi në fjalë ishte i lidhur përmes një kablloje në një motor të përforcuar në kulmin e sallës.

Nga shkaqe ende të pasqaruara, sportistja ka humbur befas drejtpeshimin dhe ka rënë nga pesë metra në sipërfaqen me akull të sallës.

Hapja solemne e Lojërave Olimpike për të Rinj mbahet nesër. Organizatorët kanë shprehur keqardhje për aksidentin, por kanë deklaruar se ceremonia e hapjes së Olimpiadës nuk do të anulohet.

---