Kurti: “Opozita po ia zgjat mandatin Qeverisë në detyrë”

Kryeministri në detyrë i Kosovës, Albin Kurti, në një deklaratë për mediat kosovare ka komentuar mbi ngërçin institucional që po zvarrit procesin e formimit të institucioneve të reja. Ai ka akuzuar opozitën për mungesë veprimi, duke thënë se “po ia zgjat mandatin Qeverisë aktuale”.

“Jam tashmë në çerekun e dytë të vitit të pestë të mandatit tim. Çdo opozitë demokratike në botë përpiqet t’ia shkurtojë mandatin Qeverisë. Vetëm opozita në Kosovë ia zgjat mandatin Qeverisë në detyrë,” – u shpreh Kurti, pas ceremonisë së vendosjes së gurthemelit për aneksin e depos së barnave të Ministrisë së Shëndetësisë.

Kurti theksoi se nuk ka asnjë marrëveshje me opozitën për të zgjatur këtë mandat dhe shtoi se aktualisht mungon një shpjegim racional për situatën e krijuar në Kuvend.

“Sa më herët që e konstituojmë Kuvendin – përmes votimit të fshehtë të Kryesisë, që po e provojmë tani, aq më shpejt hapet rruga për formimin e Qeverisë së re,” tha Kurti.

Sipas tij, vetëm pas formimit të Kuvendit mund të fillojë procesi për krijimin e Qeverisë së re, dhe partia fituese do të ketë mundësinë të dëshmojë veten për të vazhduar më tej me udhëheqjen e institucioneve.