Kurti: Heqjen e taksës për Rrugën e Kombit duhet ta bëjë Rama

Albin Kurti i ka kërkuar kryeministrit të Shqipërisë, Edi Rama, ta heqë pagesën për ‘Rrugën e Kombit’

Lideri për kryeministër nga radhët e Vetëvendosje, Albin Kurti, para pak ditësh pati një takim të gjatë me dyer të mbyllura me kryeministrin e Shqipërisë, Edi Rama, në Tiranë.

Kurti ka zbuluar në një intervistë se i ka kërkuar kryeministrit të Shqipërisë, Edi Rama, ta heqë pagesën që është vënë për ‘Rrugën e Kombit’.

Po ashtu, sipas tij, me Ramën ka folur për heqjen e barrierave mes dy shteteve, e nga këto është përmendur edhe pagesa prej 5 eurosh që duhet paguar në autostradën që e lidhë Shqipërinë me Kosovën.

“Ne kemi hapur çështjen e bashkëpunimit ekonomik dhe liberalizimit të tregut, dhe heqjen e barrierave tregtare. Dhe unë kam shprehur qëndrimin tonë se ndërkohë që e kemi një kufi të padrejtë administrativ, ta kemi dhe një pengesë shtesë për të cilën duhet të paguash. Është shumë e rëndë për qytetarin shqiptar, prandaj unë angazhohem për një zgjidhje alternative të kësaj. E kemi hapur si temë, por edhe kjo është një temë që nuk e kemi mbyllur”, ka thënë Kurti për Ora News, përcjell albinfo.ch.

---