Kroacia e vazhdon afatin e masave deri më 4 maj

Fillon t’i shqyrtojë lehtësimet

Ministri i Brendshëm kroat, Davor Bozinoviq, njoftoi se vendi i tij do t’i vazhdojë masat kufizuese deri më 4 maj, por shtoi se qeveria është duke e shqyrtuar mundësinë e lehtësimit të izolimit.

Para një muaji, qeveria i mbylli të gjitha dyqanet, restorantet dhe shkollat, ndërsa punën patën mundësi ta vazhdonin vetëm dyqanet e ushqimit, barnatoret dhe pikat e karburanteve, shkruan “Reuters”.

Kroatët kanë të drejtë të dalin nga shtëpitë apo banesat për të blerë gjëra ushqimore, për të kërkuar trajtim mjekësor, për të ecur ose për të bërë ushtrime, por jo në grupe dhe gjithmonë duke e shmangur kontaktin social. Shumë njerëz kanë punuar nga shtëpia gjatë kësaj periudhe.

Deri më tani, në Kroaci janë regjistruar 1,832 raste të koronavirusit dhe 39 viktima. Të shtunën, numri i rasteve u shtua me 18 të infektuar të rinj, që paraqet shifrën më të ulët ditore që nga 17 marsi.

Numri i rasteve të reja ka shënuar rënie të vazhdueshme gjatë kësaj jave. 50 raste u shënuan të enjten, ndërsa vetëm 23 të premten. Të dielën e kaluar në Kroaci ishin shënuar 66 infektime të reja për 24 orë.

Ministri Bozinoviq tha se qeveria po e shqyrton mundësinë e largimit gradual të masave të caktuara për ta ndihmuar ekonominë dhe njëkohësisht duke e vazhduar mbrojtjen e shëndetit të qytetarëve.

---