Rrugës për në Kosovë, mërgimtarët presin mbi 15 orë në kufirin Kroaci-Serbi

“Aktualisht presim mbi 15 orë. Pompa e fundit e benzinës ishte e stërmbushur tërësisht”, thotë për mediat zvicerane një shtetas kosovar

Mediat zvicerane raportojnë për një kaos në kufirin kroato-serb, nga i cili janë dëmtuar edhe shqiptarët nga Zvicra, që kanë marrë rrugën tokësore për pushime, në Kosovë, transmeton albinfo.ch. Ata po presin vetëm në këtë vendkalim kufitar, mboi 15 orë

Të shtunën në orën 15:20, një 35-vjeçar (A.) dhe shoqëruesi i tij arritën në fund të bllokimit të trafikut – 12 kilometra nga kufiri kroato-serb. Qëllimi i tij: të shkojë nëpër Serbi dhe më pas në Gjilan të Kosovës, shkruan blick.ch. Ai donte të kalonte pushimet e tij atje.

“Aktualisht presim mbi 15 orë. Pompa e fundit e benzinës ishte e stërmbushur tërësisht”, thotë 35-vjeçari duke përshkruar përshtypjet e tij. “Vendet e parkimit `eksplodojnë` nga numri i njerëzve .” Në pikën e karburantit mungonte edhe ushqimi. “Ne jemi dy burra të rritur, kështu që është në rregull”. Por kishte edhe shumë familje me fëmijë…

Shumë nga udhëtarët, të lodhur nga pritja, thjesht, kanë fjetur gjatë kësaj kohe.

Por, kishte edhe skena kaotike: “Ne dëgjuam bori të forta dhe vëzhguam manovra të rrezikshme parakalimi”, shoferë që përpiqeshin të dilnin përpara, me forcë, tregon A.

“Policia praktikisht nuk kishte asgjë nën kontroll.” Që nga mëngjesi i të dielës herët (6:12 të mëngjesit), Adnani është ende i bllokuar. Ai dyshon se vetëm dy-tri kalime janë të hapura në kufi. Disa media kroate raportuan për turmat e mëdha gjatë natës së mbrëmshme, përcjell albinfo.ch. Thuhej se bllokimi i trafikut ishte rritur në një gjatësi prej 20 kilometrash.

Vonesa të mëdha pati edhe në Mal të Zi dhe Bosnje-Hercegovinë.

A., nuk beson se situata do të përmirësohet shpejt. “Unë ende jam duke pritur tre deri në pesë orë në makinë”. E kjo do të thotë se ai ka ngecur në një bllokim trafiku për gati 20 orë.

---