Kosovë: Qeveria shpall 60 ditë gjendje emergjente

@pixabay

Kosova ka disa ditë që përballet me reduktime të energjisë elektrike.

Kjo situatë ka ardhur si pasojë e krizës globale të energjisë dhe rritjes së çmimit të energjisë në tregjet ndërkombëtare.

Sipas njoftimit të KEDS, kompania që furnizon konsumatorët me energji elektrike, fillimi i reduktimeve ka ardhur pas udhëzimeve që kanë marrë nga Operatori i Tregut të Energjisë në Kosovë, KOSTT.

“Sistemi elektro-energjetik i vendit është mbingarkuar tej mase. Në njëjtën kohë, duke u ballafaquar me krizën më të rëndë elektro-energjetike botërore, Operatori i Tregut- KOSTT, ka udhëzuar që të nisin kufizimet e energjisë elektrike. Kufizimet do të jenë rreth dy orë në ditë për 24 orët e ardhshme”, thuhet në njoftimin e Operatorit të Sistemit, Transmisionit dhe Tregut të Energjisë Elektrike të Kosovës.

Kjo situatë ka shkaktuar pakënaqësi tek konsumatorët, sidomos tek bizneset të cilët thonë se reduktimet po u shkaktojnë probleme e dëme.

Nga ana tjetër, edhe KEDS (Kompania Kosovare për Distribuim me Energji Elektrike), edhe qeveria kanë bërë thirrje që të kursehet energjia sa më shumë.

Ata kanë kërkuar nga qytetarët që aty ku ka mundësi të përdoren forma alternative për ngrohje dhe jo energjia elektrike.