Kirurgu i madh do t`ia gjejë Ema Bytyçit një zemër të vogël

Por,e dhimbshmja është se një fëmijë tjetër i vogël duhet të vdesë që të gjendet një zemër për Emën e vogël

Kirurgu i zemrës, René Prêtre nga Spitali Universitar i Lozanës është një yll në mesin e mjekëve në Zvicër. Më shumë se 5000 zemra fëmijësh i ka operuar ai deri tash por thotë se në secilin rast individual ka bashkëndjerë me të operuarit, shkruan blick.ch.

Prêtre në vitin 2009 ishte zgjedhur “Zvicerani i vitit” për meritat e tij në mjekësi dhe humanizëm, transmeton albinfo.ch.

Si shef i Kardiokirurgjisë në Spitalin Universitar të Lozanës, ai më së shumti kujdeset për fëmijët që kanë probleme me zemrën.

“Zemrat më të vogla janë më të vështirat për t`u `riparuar` dhe mbase sfida më e madhe në profesionin tim. Mirëpo unë i operoj ato me dëshirë, pasi që ato (zemrat) pas ndërhyrjes sonë vazhdojnë pastaj të rrahin me dhjetëra vite të tjera dhe kjo është e bukura në detyrën tonë”, thotë mjeku i zemrave.

Por, jo të gjthë pacientët e vegjël mund të ndihmohen menjëherë. Ema Bytyçi 2 vjeçare për shembull pret që nga nëntori i vitit të kaluar për një zemër të dhuruar që i përshtatet. Atë e shoqërojnë nëna Arbenita dhe babai, Arbiani.

Pas një ndërprerjeje të  rrahjeve të zemrës, Ema e vogël qe operuar dhe i qe vendosur një zemër artificiale, përcjell albinfo.ch.

Mirëpo për të ardhmen ajo ka nevojë për një zemër të vërtetë, për një zemër të re.

“Sipas rregullit një zemër e re, e përshtatshme mund të gjendet brenda një viti”; thotë Prêtre. Por,e dhimbshmja në gjithë këtë është se një fëmijë tjetër i vogël duhet të vdesë që të gjendet një zemër për Emën e vogël. Dhe, siç e thotë mjeku, “më pikëllon sa herë që dëgjoj se dikush kaq i ri ka vdekur…”