Kërkohet mbështetje për të papunët e moshuar

Një statistikë e publikuar ditë më parë ka vënë në dukje se shkalla e mbi 50 vjeçarëve të mbetur pa punë më gjatë se një vit në Zvicër, në mars të këtij viti ka qenë 26.8 për qind

Kush ka humbur punën në moshën mbi 50 vjeçare e ka shumë të vështirë të gjejë sërish veten në tregun e punës në Zvicër. Duke pasur parasysh këtë gjë, federata e sindikatave “Travail Suisse” kërkon mbrojtje dhe mbështetje të orientuar nga kjo kategori punëmarrësish, shkruan srf.ch.

Sipas saj, kantonet do të duhej të ofrojnë në dispozicion oferta trajnimi ndërsa qendrat regjionale të ndërmjetësimit të punës, të jetësojnë në mënyrë më të vendosur detyrimin për njoftimin rreth vendeve të lira të punës.

Në rast se gjendja në këtë drejtim përkeqësohet edhe më tutje, Travail Suisse kërkon që për personat në moshën mbi 50 vjeçare të vendosen afate më të gjata për heqje nga puna.

Një statistikë e publikuar ditë më parë ka vënë në dukje se shkalla e mbi 50 vjeçarëve të mbetur pa punë më gjatë se një vit në Zvicër, në mars të këtij viti ka qenë 26.8 për qind, transmeton albinfo.ch. Për të parë se sa dramatike është gjendja duhet ditur se te të rinjtë nga 15 deri 24 vjeçarë kjo shkallë është vetëm 2.3% ndërsa te kategoria 25-49 vjeçe, 14.1%.