Kapet i dyshuari për vrasjen e terapeutes Adeline

I dënuari me 20 vjet burg për dy dhunime të kryera, Fabrice A., është kapur në kufirin në mes të Gjermanisë dhe Polonisë

Ndjekja e përmasave ndërkombëtare që i është bërë të dyshuarit për vrasjen e terapeutes sociale, të kryer të premten që shkoi ka sjellë rezultat. I dënuari me 20 vjet burg për dy dhunime të kryera, Fabrice A.,  është kapur në kufirin në mes të Gjermanisë dhe Polonisë. Prokuroria e përgjithshme e Gjenevës ka vërtetuar të dielën një raportim që ka publikuar  gazeta “Tribuine de Geneve” lidhur me arrestimin e personit në fjalë.

Siç është raportuar gjerësisht në mediet e Zvicrës gjatë këtyre tri ditëve, i dënuari kishte dalë të enjten rreth orës 11 paradite nga qendra për terapi sociale “La Paquerette” e Gjenevës së bashku me terapeuten sociale, për kalërim, që ishte pjesë e terapisë.

Pasi që ata nuk ishin paraqitur në terminin e paraparë në orën 11 në sallën e kalërimit dhe terapeutja nuk u përgjigjej telefonatave, qe ngritur alarmi. Të nesërmen, e premte, ishte gjetur kufoma e terapeutes 34 vjeçare në një pyll afër Gjenevës.

I dyshuari për vrasje ishte në arrati. Gjurmët e fundit të tij çonin në stacionin e trenit në Weil am Rhein të Gjermanisë. Pastaj ai është kërkuar më kot nga policia gjermane me angazhimin e njësiteve speciale dhe me helikopterë.

Rrethanat e kapjes së tij, që ka ndodhur sot, ende nuk janë sqaruar plotësisht.