Ka fshehur ekzistimin e fëmijës me gruan tjetër, gjykata i jep të drejtë shtetasit të Maqedonisë

Kjo gjykatë e ka hedhur poshtë një vendim të autoriteteve të Valisit të cilat ia kishin marrë shtetasit të Maqedonisë lejen e qëndrimit të përhershëm për shkakun se ai nuk kishte treguar se në vendin e tij të prejardhjes kishte një fëmijë

Të huajt në Zvicër nuk e humbin lejen e qëndrimit të përhershëm (Viza C) edhe nëse ata e kanë heshtur para autoriteteve zvicerane ekzistimin e fëmijëve nga një raport i mëhershëm jashtëmartesor. Një qëndrim të tillë e ka marrë Gjykata Federale mbi rastin e një shtetasi të Maqedonisë, shkruan albinfo.ch.

Kjo gjykatë e ka hedhur poshtë një vendim të autoriteteve të Valisit të cilat ia kishin marrë shtetasit të Maqedonisë lejen e qëndrimit të përhershëm për shkakun se ai nuk kishte treguar se në vendin e tij të prejardhjes kishte një fëmijë.

Në korrik të vitit 2000, rreth gjashtë muaj para lindjes së të birit, ai ishte martuar me një zvicerane. Përmes kësaj martese personi i përmendur kishte fituar lejen e qëndrimit të përhershëm në Zvicër (Viza C).

Në gusht të vitit 2011 prishte kurora në mes të dy të martuarve ndërsa pak më shumë se një vit pas kësaj ai martohet me nënën e të birit, me të cilën në vitin 2010 tashmë kishte edhe fëmijën e dytë.

Në saje të kërkesës për bashkim familjar që ai e kishte bërë në marsin  e vitit 2013, autoritetet e kuptuan se ushtruesi i kërkesës kishte dy fëmijë për çfarë dhe ja morën lejen e qëndrimit në Zvicër.

Këtë hap ata e mbështetën në faktin se personi në fjalë gjatë procedurës së marrjes së lejes që qëndrimit kishte heshtur me qëllim fakte me rëndësi thelbësore, transmeton albinfo.ch vendimin e gjykatës. Këto fakte lënë të kuptohet se martesa e tij e lidhur në Zvicër ishte martesë fiktive.

Gjykata Kantonale e Valisit në vitin 2015 kishte miratuar veprimin e autoriteteve. Mirëpo, Gjykata Federale si shkalla më e lartë e gjyqësisë në Zvicër e ka miratuar së fundi ankesën e bërë nga shtetasi i Maqedonisë kundër vendimit të përmendur.

Gjykata Federale ka ardhur në përfundimin se të huajt nuk kanë detyrim që vetvetiu t`i njoftojnë autoritetet lidhur me ekzistimin e fëmijëve që rrjedhin nga një lidhje e mëparshme ose paralele me atë në bazë të së cilës personi ka fituar lejen e përkohshme ose të përhershme të qëndrimit.

Gjykata Federale në vendimin e saj ka konstatuar se për të marrë një përgjigje lidhur me çështjen në fjalë, autoritetet duhet të shtrojnë një pyetje përkatëse të saktë, përcjell albinfo.ch. Përndryshe, heshtja e ekzistimit të fëmijëve nga një lidhje tjetër nuk është bazë për mohimin e lejes së qëndrimit.